Italia ka kthyer faqen pas dështimit në Oslo dhe shkarkimit të Luciano Spalletti-t. Federata Italiane e Futbollit ka zgjedhur Gennaro Gattuso-n si trajnerin e ri të Kombëtares “azzurre”, me objektivin e qartë: kualifikimi në Botërorin e ardhshëm.
I prezantuar zyrtarisht në një konferencë për shtypin në Romë, Gattuso nuk e fshehu emocionin dhe përgjegjësinë që sjell ky post:
“Ky është një moment i veçantë për mua. Është një ëndërr që bëhet realitet. Shpresoj të jem në lartësinë e detyrës. E di që nuk është një mision i lehtë, por në jetë asgjë nuk është e lehtë”, tha trajneri i ri, kampion bote me Italinë në vitin 2006.
Ai shtoi se puna dhe përkushtimi do të jenë thelbësore:
“Unë dhe stafi im e dimë që ka shumë për të bërë. Duhet të udhëtojmë, të flasim me lojtarët, të hyjmë në kokën e tyre. Prej vitesh dëgjoj se Italia nuk ka më talente, por unë nuk jam dakord. Lojtarët janë, duhet vetëm t’i vendosim në kushtet e duhura për të shprehur më të mirën e tyre.”
Gattuso përfundoi me një premtim: “Qëllimi është një dhe i qartë: ta çojmë Italinë në Botëror. Për ne dhe për të ardhmen e futbollit italian është thelbësore.”
