Melania Trump është vënë në qendër të kritikave, sa i takon zgjedhjes në veshje. Gjatë vizitës së mbajtur në një qendër në Teksas, ku mbahen fëmijët emigrantë, Zonja e Parë e Shteteve të Bashkuara të Amerikës mbante veshur një xhaketë, në të cilën ishte shkruar: “Nuk më intereson fare, po ty?”. Veshja e saj ra në sy më së miri teksa Zonja e Parë ngjiste shkallët e avionit presidencial.
Pas komenteve të shumta, zonja Trump reagoi përmes zëdhënëses së saj, duke sqaruar se veshja dhe shkrimi mbi të nuk kishte asnjë mesazh të fshehur dhe as nuk ishte zgjedhje satirike e qëllimtë.
Xhaketa Zara, e cila kushtonte vetëm 39 dollarë, shkaktoi një lumë reagimesh në rrjetet sociale. Vetë Presidenti Donald Trump reagoi në Twitter duke theksuar se shkrimi në xhaketën e së shoqes i referohej mediave që bëjnë lajme të rreme.
