Jusuf Fofana është pa dyshim ndër lojtarët më të rëndësishëm të Milanit.
Vlera e tij është thelbësore për lojën e sidomos ekuilibrat kuqezi.
Edhe pse ndaj Kaljarit bëri një gabim që u pasua me golin e barazimit të miqve, francezi mbetet i paprekshëm.
Edhe me rrezikun për të mos e pasur në fushë kundër Juves pasi në rast kartoni sot ai nuk do të mund të luajë në ndeshjen e shtunës ndaj bardhezinjve.
Vetë Fofana ka dhënë disa deklarata ditën e djeshme në daje nga “Milanello”.
Duke folur për mikrofonët e “Sportmediaset”, ai theksoi: “Konseisao i ka idetë e qarta dhe është shumë kërkues. Është e qartë se duhet të punojmë akoma për të kuptuar edhe më mirë atë që na kërkohet. Mos harrojmë se ka ardhur vetëm dy javë më parë dhe koha për të punuar ka qenë e pakët sepse fillimisht ishte Superkupa e më pas menjëherë nisja e kampionatit. Ne si futbollistë duhet të kuptojmë sa më shpejt strategjinë e trajnerit dhe të praktikojmë në fushë menjëherë”.
Ndaj Kaljarit, Milani goditi 25 herë në drejtim të portës duke shënuar vetëm një gol. E qartë që duhet korrigjuar shënjestra, por për Fofananë ekipi nuk ka probleme në aspektin ofensiv.
“Kemi sulmues shumë të mirë dhe nuk ka asnjë problem goli në ekipin tonë. Pulisiç, Reijnders, Abraham e Morata kanë treguar se mund të shënojnë dhe na kanë dhënë një ndihmë të madhe. Siç e thashë, problemi ynë ka të bëjë me efikasitetin përpara portës dhe jo me sulmuesit” shtoi mesfushori të cilit Milani po i kërkon një alternativë në merkato për t’i dhënë pak pushim.
Deri më tani Fofana ka luajtur 26 herë me kuqezinjve duke shënuar një gol.
Në bilancin e tij edhe gjashtë asiste në të gjitha turnetë, por është puna në mesfushë ajo që e ka kthyer në një të paprekshëm, si për Fonsekën deri dy javë me parë ashtu edhe për Konseisaon në tri ndeshjet e tij mbi pankinën e “Djallit”.
