Granit Xhaka dhe Xherdan Shaqiri, do të jenë subjekti i një hetimi të hapur nga trupi disiplinor i FIFA-s, pas festimeve të tyre me simbolin e shqiponjës.
Përmes një deklarate të nxjerrë nga FIFA, thuhet se Komisioni Disiplinor i FIFA-s ka hapur një procedurë disiplinore ndaj lojtarëve të Zvicrës, Granit Xhaka dhe Xherdan Shaqiri, sa i takon festimeve të tyre të golave kundër Serbisë.
“Komisioni Disiplinori i FIFA-s, ka hapur një procedurë disiplinore ndaj lojtarëve të Zvicrës, Granit Xhaka dhe Xherdan Shaqiri, për festimet e tyre të golave kundër Serbisë.
Në lidhje me të njëjtën ndeshje, janë hapur edhe procedura disiplinore ndaj Federatës së Serbisë, për shfaqje të mesazheve politike nga ana e tifozëve serb, si dhe për rrëmuja tifozësh.
Gjithashtu, një hetim është hapur edhe kundër trajnerit të Serbisë, Mladen Krstajiç, për deklaratat e bëra në përfundim të ndeshjes”, përfundon deklarata.
Zvicra siguroi një sukses të rëndësishëm ndaj Serbisë falë golave të shqiptarëve, Granit Xhaka dhe Xherdan Shaqiri.
Golat e tyre kanë çuar në ekzaltim të gjithë tifozët zviceranë, e sidomos shqiptarët e Kosovës.
Golat janë pasqyruar edhe në median kosovare, ku nuk fshihej aspak entuziazmi dhe fjala shqiponjë ishte kryefjala e çdo artikulli të tyre.
