Pavarësisht se atmosfera pas fitores me Dinamon ka qenë shumë pozitive dhe adrenalina ka qenë në doza të larta, te Vllaznia kanë kërkuar që të mos e “teprojnë” me festimet.
Gëzimi i skuadrës ka qëndruar vetëm brenda dhomave të zhveshjes të stadiumit “Arena Kombëtare”, ku kuqeblutë kanë festuar pas triumfit në duelin ndaj kryeqytetasve. Kjo, për t’u përqendruar te finalja e madhe e 12 majit dhe kërkimi i triumfit final në kampionat, pasi ende asgjë s’ka përfunduar për skuadrën shkodrane dhe prandaj kërkohet të qëndrohet me “këmbë në tokë”.
Duke mos e tepruar edhe në daljet apo deklaratat në media përpara një dueli kaq të rëndësishëm, skuadra duket totalisht e përqendruar te finalja dhe kundërshtari që do kenë përballë. Duke bërë që faktorë të tjerë që s’kanë lidhje me ndeshjet në fushë për momentin të lihen në plan të dytë bashkë me festën e madhe që pritet të zhvillohet në Shkodër vetëm pas një triumfi të mundshëm në finalen e 12 majit që do zhvillohet në “Arena Kombëtare”.
