Ekspozimi i fëmijëve ndaj ekraneve të pajisjeve elektronike po ndikon së tepërmi në sjelljen dhe zhvillimin e tyre gjuhësor.
Logopedja Aurora Lushej theksoi se qëndrimi i gjatë para ekraneve ka sjellë një rritje të rasteve me hiperaktivitet, çrregullime të sjelljes dhe vonesa në të folur.
‘’Kohët e fundit po vihet re në fakt prezenca e problematikave të sjelljes ose çrregullimeve të sjelljes nisur kjo edhe nga ekspozimi i tepërt përpara ekraneve por edhe mospasja e një kohe të shëndetshme të fëmijës përgjatë ditës.
Vihet re edhe një rritje e hiperaktivitetit edhe kjo lidhet me ekspozimin para ekraneve’’.
Për të parandaluar këto probleme, ekspertët rekomandojnë që prindërit të kufizojnë kohën që fëmijët kalojnë para ekraneve dhe të inkurajojnë aktivitete që stimulojnë zhvillimin e aftësive sociale dhe gjuhësore, si leximi dhe lojërat ndërvepruese.
‘’Të kalojnë sa më tepër kohë cilësore me fëmijët’’.
Për të është e rëndësishme që prindërit të jenë të vetëdijshëm për ndikimin e mundshëm të ekspozimit ndaj ekraneve në zhvillimin e fëmijëve të tyre dhe të ndërmarrin hapa për të siguruar një zhvillim të shëndetshëm .
