Emisari special i Bashkimit Evropian për dialogun Kosovë-Serbi, Peter Sorensen, në një intervistë për median “Agenzia Nova” në Itali, e sheh dialogun Kosovë-Serbi, si një proces të vazhdueshëm që zhvillohet çdo ditë për të përmirësuar jetën e njerëzve.
Sorensen tha se që nga marrja e detyrës ka mbajtur mbi 60 takime zyrtare në rajon dhe ka qenë organizator i dy raundeve të takimeve të kryenegociatorëve në Bruksel.
“Procesi nuk është gjithmonë linear dhe shumica e tij ndodh prapa skenave, por çdo ditë po bëhet përparim i vërtetë”, theksoi ai.
Sipas Sorensen, në këto takime janë diskutuar çështje konkrete që përfshijnë bashkëpunimin ekonomik, si dhe kërkimin dhe identifikimin e personave të zhdukur gjatë luftës së Kosovës midis viteve 1998 dhe 2000.
Siç thuhet në artikull, ai theksoi se procesi nuk është gjithmonë linear dhe shumë nga puna zhvillohet prapa skenave, siç thotë ai por çdo ditë bëhet përparim real.
“Dialogu është pikërisht platforma në të cilën Kosova dhe Serbia mund t’i adresojnë mosmarrëveshjet me qetësi dhe konstruktivitet. Prandaj, ne i inkurajojmë si Kosovën ashtu edhe Serbinë që të përmbahen nga shkëmbimet publike për të shfrytëzuar plotësisht këtë platformë dhe të përqendrohen te zbatimi i angazhimeve të tyre të dakorduara në dialog”, tha Sorensen.
