Një oligark moldav dhe ish-politikan i lartë është ekstraduar nga Greqia në Moldavi, i akuzuar si i dyshuari kryesor për vjedhjen e 1 miliard dollarëve (748 milionë paund).
Vladimir Plahotniuc, 59 vjeç, u transportua me aeroplan nga Athina në Kishinau të enjten në mëngjes dhe më pas u dërgua në një qendër paraburgimi në kryeqytetin e Moldavisë, ka raportuar BBC.
Shuma, e quajtur “vjedhja e shekullit”, vlerësohet se përbënte rreth 12 për qind të produktit të brendshëm bruto të vendit.
Plahotniuc ka luftuar kundër akuzave për vite me radhë dhe pritet të dalë për herë të parë para një gjykate në Kishinau më 26 shtator, ka deklaruar avokati i tij, Lucian Rogacka.
Mbërritja e manjatit në Moldavi vjen ndërsa vendi po përgatitet për zgjedhjet parlamentare të planifikuara për në datën 28 shtator.
Plahotniuc iku nga Moldavia në vitin 2019, kur Partia e tij Demokratike u rrëzua nga pushteti.
Pas ekstradimit të tij ka reaguar dhe presidentja e Moldavisë, Maia Sandu, në një postim në rrjetet sociale, ku ka shkruar: “Nëse nuk dorëzohesh kur është e vështirë dhe vazhdon të luftosh, e gjithë shoqëria vazhdon të luftojë, edhe kriminelët që dukeshin të pamposhtur dalin para drejtësisë.”
Ndërkohë, më herët këtë javë, Sandu akuzoi Moskën për “derdhjen e qindra miliona eurove” në Moldavi në një përpjekje për të nxitur dhunën dhe për të përhapur dezinformim dhe frikë.
“Kremlini beson se të gjithë jemi në shitje. Se jemi shumë të vegjël për t’i rezistuar… Por Moldavia është shtëpia jonë. Dhe shtëpia jonë nuk është në shitje,” tha presidentja.
Duke folur në Asamblenë e Përgjithshme të OKB-së në Nju Jork të mërkurën, Presidenti ukrainas Volodymyr Zelensky paralajmëroi se Evropa nuk mund të përballojë humbjen e Moldavisë ndaj ndikimit rus, pasi dështoi të shpëtojë Gjeorgjinë dhe Bjellorusinë nga orbita e Moskës.
Zelensky tha se Presidenti rus Vladimir Putin “do të vazhdojë ta çojë luftën përpara gjithnjë e më thellë” nëse nuk ndalet.
SVR paralajmëroi se BE-ja mund të nisë “një inkursion të armatosur dhe pushtim de facto” të Moldavisë, duke pretenduar në mënyrë të rreme se BE-ja po vendoste trupa.
