Egnatia nuk di të ndalet. Kampionët në fuqi fituan sfidën hapëse të javës së 23 të kategorisë superiore, teksa në “Egnatia Arena” mposhtën 2-1 Bylisin, duke regjistruar fitoren e 4 radhazi, e duke krijuar shkëputje nga ndjekësit.
Një sukses i merituar ky për ekipin e udhëhequr nga Edlir Tetova që dominoi mbi skuadrën ballshiote. Pjesa e parë përfundoi me rrjeta të paprekura, pavarësisht se rrogozhinasit i’u afruan në më shumë se 1 rast golit. Në minutën e 13 do të ishte Ndreca që do të ishte i pafat me topin e goditur nga ai që do të ndalej në traversë. Në fundin e pjesës së parë sërish vendasit me Regi Lushkjan do të flirtonin me golin, teksa ish mesfushori i Tiranëss gaboi nga fare pranë portës kundërshtare.
Megjithatë vendasit do të korrigjonin shënjestrën në pjesën e dytë teksa në minutën e 56, pas një aksioni të rrjedhshëm nga e djathta Bakayoko gjen në zonë Lushkjan që kësaj radhe nuk fal për golin e avantazhit. Megjithatë rrogozhinasit nuk do të ndaleshin me kaq, teksa në minutën e 74, Ndreca me kokë devijon saktë topin e krosuar nga goditja e dënimit, duke i çuar shifrat në 2-0.
Ballshiotët e rihapën ndeshjen pas golit të nigerianit Malomo, 7 minuta nga fundi, por vetëm kaq. Sfida përfundoi me suksesin e 4 radhazi të Egantias, që me këto 3 pikë, shkon në kuotën e 42 pikëve, duke shtuar presionin mbi kundërshtarët, ndërsa Bylis pëson humbjen e dytë radhazi, pas asaj ndaj Tiranës, duke mbetur e pozicionuar për momentin në vendin e 6 me 24 pikë.
