9 fitore në 9-të ndeshje radhazi. Egnatia nuk di të ndalet, me ekipin e Tetovës që vijon ecurinë perfekte këtë sezon. Kampionët në fuqi po kalojnë një moment fantastik, më të mirin që kur për herë të parë u ngjitën në elitë, këtë e konfirmuan edhe ndaj Partizanit duke kaluar me lehtësi ekipin e kuq. Egnatia triumfoi me rezultatin 2-0 duke qëndruar të qetë në krye në kuotën e 48 pikëve, 8 më shumë se Partizani. Ekipi i Veselinovic ka harruar si fitohet pasi mes kampionatit dhe Kupës kjo ishte 5 radhazi që “demat” zhgënjejnë.
Egnatia e nisi ndeshjen me gol pasi në zbritjen e parë në sulm, që në minutën e 5-të, Regi Lushkja me një parabël të ëmbël kaloi portierin Qirko duke sjell festë në shkallët e stadiumit. Partizani u përpoq të rikthehej në lojë, por ishin të pafat teksa goditja e Bintsuka-s në mimutën e 27-të u ndal në shtyllën pingule. Historia nuk ndryshoi as në fraksionin e dytë me Egnatian që dukshëm ishte më superiore. Në minutën e 52-të vendasit gjetën sërish rrugën e rrjetës me një kundërsulm perfekt, por gjyqtari i takimit pas konsultimeve me dhomën e VAR anuloi gjithçka për pozicion jashtë loje.
Goli i dytë i Egnatias nuk vonoi shumë pasi në minutën e 62-të një ish i famshëm si Sota gjetë rrugën e rrjetës gjatë zhvillimeve të një goditje këndi. Në shenjë respekti ndaj ish ekipit të tij, Sota nuk festoi. Minutat e mbetura nuk sollën ndryshim në rezultat, me Egnatia që feston për këtë trepikësh, një test i fortë prove përpara final-four”. Në sfidën tjetër të javës së 25-të, Bylis dhe Elbasani ndanë nga një pikë pas barazimit 1-1.
