Kryeministri Rama ka reaguar lidhur me vendimin e Arbirazhit për ta dëmshpërblyer me 100 milionë euro biznesmenin Becchetti, pas mbylljes së “Agon Channel”.
Përmes një postimi në “Twitter”, Rama shkruan se çështja “Becchetti” risillet në vëmendje para çdo fushate elektorale, ndërsa thekson se Becchetti është dënuar me 16 vite burg nga drejtësia shqiptare.
Sipas Ramës është një lajm i prodhuar nga kundërshtarët e tij të cilët e risjellin në vëmendje çdo fushatë dhe më pas humbasin zgjedhjet, duke theksuar se e njëjta gjë përsëritet dhe në fushatën tjetër.
“Para çdo fushate del që Beketi i dënuar me 16 vjet burg për mashtrim i mori Shqipërisë 100mln€! Pastaj shokët e tij këtu humbin zgjedhjet dhe kur vjen fushata tjetër del që s’i ka marrë atëherë po i mori tani! Prapë kështu do ndodhë me shokët e mashtros! Deri fushatën tjetër!”, shkruan Rama.
Në mediat ditën e sotme u raportua se “Agon Channel” fitoi në përballjen me qeverinë shqiptare, pasi Arbitrazhi i Bankës Botërore rrëzoi rekursin e qeverisë Rama dhe i dha të drejtë televizionit të biznesmenit italian Francesco Becchetti duke lënë në fuqi vendimin e marrë më herët.
