Sezonit në Serinë A po afron starti dhe si zakonisht, në elitën e futbollit italian do të ketë shumë lojtarë të Kombëtares shqiptare si protagonistë.
Por për një prej tyre, ky edicion do të jetë edhe më i veçantë, pasi numri i fanellës që i është besuar, e bën atë padyshim një element për t’u ndjekur me vëmendje.
Klubi i Leçes ka ndarë fanellat për sezonin e ri dhe i ka besuar atë me numrin 10 një mesfushori të Kombëtares shqiptare të futbollit.
Bëhet fjalë për Medon Berishëm, i cili në vitin e kaluar kishte luajtur duke mbajtur fanellën me numrin 5.
Këtë vit, fanella me numrin 10 kishte mbetur bosh dhe te Leçe ia kanë dorëzuar mesfushorit shqiptar, edhe si një shenje e besimit të madh që kanë te aftësitë e tij dhe se mund të bëhet një emër i rëndësishëm për këtë klub që objektiv kryesor ka të sigurojë përsëri mbijetesën në elitë.
Sa i përket Ylber Ramadanit, ai e fillon përsëri sezonin me numrin e zakonshëm, duke mos ndryshuar 20-ën që mban në radhët e Leçes.
