Këngëtarja dhe finalistja e Big Brother VIP Albania 4, Rozana Radi, ka sqaruar mbrëmjen e djeshme përpara mysafirëve në shtëpinë më të famshme në Shqipëri, arsyen pse ajo nuk reagoi në momentin kur Jozi Marku goditi me shuplakë Gjestin gjatë gjysmëfinales live.
Në një bisedë të sinqertë me figurat e njohura të ekranit të Top Channel, të cilët hynë për të kaluar kohë me banorët, prezantuesja Bieta Sulo e pyeti hapur Rozanën për mungesën e reagimit të saj ndaj një momenti të konsideruar të shëmtuar televizivisht.
Rozana u shpreh se ishte e tronditur dhe nuk kuptoi menjëherë se çfarë kishte ndodhur. “Një moment shumë i çuditshëm…
njerëzit që më njohin e dinë që nëse unë shoh në rrugë një burrë që i bërtet një gruaje, unë zbres nga makina”, tha ajo.
Ajo shtoi se ishte pas Jozit në atë moment dhe nuk e pa direkt veprimin: “Unë u mpiva komplet dhe kam zbritur te Gjesti. Nuk e kam parë atë momentin, kam qenë mbas Jozit… e di si ka qenë momenti? Kam dalë këtu në bahçe dhe ata kanë dalë duke qeshur të dy, dhe unë mendova se ata e kanë bërë me fjalë që të bënin një show të madh”.
Këngëtarja e njohur përfundoi rrëfimin duke treguar se vetëm kur pa fytyrën e Gjestit, e kuptoi që situata ishte serioze: “Kur kam parë Gjestin, jam ulur dhe e kam parë. Kaq ka qenë gjëja”.
Deklarata e saj ka ngjallur diskutime të shumta në rrjet, ndërsa banorët ndodhen vetëm pak ditë larg finales së madhe, që do të shpallë fituesin e edicionit të katërt të BBVA.
