Një sulm me armë në një shkollë të krishterë në Wisconsin ka lënë të paktën dy persona të vdekur dhe disa të plagosur.
Ngjarja e rëndë ndodhi mëngjesin e së hënës në shkollën Abundant Life Christian School, në Madison, Wisconsin.
Sipas raportimeve, dy persona kanë humbur jetën dhe të paktën tre të tjerë janë plagosur. Burime lokale tregojnë se autori i sulmit ka vrarë veten, megjithëse ende nuk është e qartë nëse ai përfshihet në numrin e viktimave.
Policia konfirmoi se autori i të shtënave është “neutralizuar.”
Raportet e para thonë se sulmuesi hyri në shkollë dhe hapi zjarr. Ende nuk dihet nëse viktimat janë nxënës, pjesëtarë të stafit, apo të dyja palët.
Zona rreth shkollës, e cila ndodhet në Dane County dhe ka rreth 390 nxënës nga kopshti deri në klasën e 12-të, është aktualisht e rrethuar nga forca të shumta policore.
“Ky është një hetim aktiv dhe i vazhdueshëm,” thuhet në një deklaratë të policisë së Madison-it. “Më shumë informacione do të publikohen sapo të jenë të disponueshme. Për momentin, u kërkojmë qytetarëve të shmangin këtë zonë.”
Ngjarja ndodhi vetëm pak ditë para pushimeve të Krishtlindjeve, ndërsa nxënësit po përgatiteshin për një ndeshje basketbolli të planifikuar për mbrëmjen e së hënës.
Senatori i Wisconsin-it, Ron Johnson, reagoi në rrjetin X duke thënë:
“Ngushëllimet dhe lutjet e mia më të sinqerta për viktimat e tragjedisë në shkollën Abundant Life Christian School. Do të vazhdoj ta ndjek nga afër këtë situatë.”
