Dinamo u përball me 5 mungesa të rëndësishme në ndeshjen e fundit me Skënderbeun dhe ato sigurisht që ndikuan në rezultatin final.
Portieri Edmir Sali, mbrojtësi Bruno Dita, mesfushorët Ardit Toli dhe Gasama Karamba, si dhe sulmuesi Peter Itodo Mandela ishin jashtë skuadre në këtë sfidë, të gjithë për arsye dëmtimi. Blutë barazuan 1-1, duke lënë kështu dy pikë të çmuara në “Elbasan Arena”, ndërsa të enjten do të ndeshen sërish me korçarët në të njëjtin stadium, por në kuadër të çerekfinales së parë të Kupës së Shqipërisë. Deri atëherë trajneri Ilir Daja duhet të bëjë llogaritë me lojtarët që do të ketë në dispozicion, me shpresën që të paktën ndonjë nga të dëmtuarit të rikthehet. Ai përmendi faktin se mungesat janë shqetësuese, sepse janë në boshtin e formacionit, ndaj dhe do të shihet deri të enjten se çfarë do të ndodhë.
E sigurt është se Sali dhe Toli do të mungojnë edhe në Kupë, sepse nuk mund të rikuperohen në kohë. Kapiteni Dita është kthyer nga Serbia, ku bëri disa seanca terapie speciale, ka filluar vrapimet, por nuk pritet të jetë gati të enjten. Sali, i cili mungon prej disa javësh, ka filluar të bëjë disa ushtrime, por ende nuk është në gjendje të bëjë stërvitje të plotë me grupin. Shpresat më të mëdha janë që Toli dhe Karamba të jenë të paktën në stol, ndërkohë që po monitorohet gjendja e Mandelës, që vuan një shqetësim muskulor që nga derbi me Partizanin. Nga lojtarët e tjerë duhet përmendur rikthimi nga dëmtimi i mesfushorit Doçi. Ndoshta këtë herë stafi dinamovit do të bëjë ndonjë ndryshim në formacion me qëllimin për të menaxhuar sa më mirë energjitë edhe për sfidën e radhës në kampionat kundër Teutës.
REVANSHI – Dinamo dhe Skënderbeu do të ndeshen të enjten për herë të 4-t këtë sezon. Vetëm në aktin e parë blutë kanë arritur të fitojnë dhe me jo pak vështirësi. Ishte Mandela që vendosi atë fitore në fazën e parë të kampionatit me një gol në minutën e fundit në “Elbasan Arena”. Në dy ndeshjet e tjera Dinamo ka barazuar me korçarët, 2-2 në transfertë dhe së fundi 1-1 në Elbasan. Kupa ka një specifikë tjetër dhe vlerësimi në kampin dinamovit është maksimal, sepse shihet si një mundësi për të shkuar në Europë.
Kryeqytetasit kanë si objektiv që të enjten të hedhin një hap drejt kualifikimit në gjysmëfinale, për të shkuar më të sigurt në ndeshjen e kthimit në Korçë. Për këtë arsye synohet një fitore sa bindëse ndaj një kundërshtari, që prodhon futboll, edhe pse mban vendin e fundit në tabelën e renditjes. Blutë e provuan këtë fakt të shtunën që shkoi dhe do të përpiqen ta përgatisin ndeshjen e radhës sa më mirë.
