Partia Demokratike e Kosovës, ka reaguar lidhur me situatën e ditës së sotme gjatë seancës së sotme plenare. Përmes një postimi zyrtar, PDK ka dënuar ashpër dhunën e ushtruar nga zëvëndëskryeministri Besnik Bislimi, ndaj deputetëve të kësaj force politike.
Sipas PDK ishte pikërisht Bislimi i cili goditi i parë me mjete të forta, shishe, deputetin e opozitës Mërgim Lushtaku.
Sipas tyre qeveria, kryeministri Albin kurti po tentojnë të fshehin koordinimin dhe bashkëpunimin me Millan Radojçiqin, duke përdorur çdo mjet dhune ndaj deputetëve të opozitës.
” Një Qeveri që bashkëpunon me kriminelët serbë, në dëm të interesit të shtetit dhe qytetarëve të Kosovës, duhet të shkoj në shtëpi një orë e më par”, thuhet në reagimin e tyre.
Reagimi i plotë:
PDK dënon ashpër sulmin e zëvendëskryeministrit Bislimi ndaj deputetëve të PDK-së
Sikur të mos u mjaftonte fyerja që i bënë shtetit të Kosovës, veteranëve të UÇK-së, akterëve politik shqiptarë, popullit të Kosovës, para shërbëtorëve të Radojçiqit, sot, në Kuvendin e Kosovës, zëvendëskryeministri Besnik Bislimi në vend që të ndihej i turpëruar dhe të jepte llogari për përgjimet, provokoi opozitën duke i hequr fotografinë që ata i vendosën në foltore.
Madje, ishte pikërisht zëvëndëskryeministri Bislimi i cili i pari e goditi me mjete të forta, shishe, deputetin Mërgim Lushtaku.
Në një moment kur Kryetari i Kuvendit u desh që të reagojë dhe të mos e lejoj atë që të ndodhë, ai u bëri thirrje Policisë së Kosovës që të ndërhyjnë dhe të arrestojnë deputetët e opozitës.
Futja e Policisë së Kosovës në Kuvend nuk është lejuar të ndodhë as në momentin më të errët në historinë e Kuvendit të Kosovës, kur Lëvizja Vetëvendosje hidhte gaz lotsjellës dhe rrezikonte jetën e deputetëve.
Tani, gjithçka është e qartë. Kjo Qeveri, ky kryeministër, ky pushtet, shihet qartë se duke tentuar të fshehë koordinimin dhe bashkëpunimin me Millan Radojçiqin, po përdorë çdo mjet, edhe dhunën, ndaj deputetëve opozitarë. Ky Kuvend dhe kjo Qeveri nuk kanë më kurrfarë kuptimi dhe asnjëlloj kredibiliteti.
Një Qeveri që bashkëpunon me kriminelët serbë, në dëm të interesit të shtetit dhe qytetarëve të Kosovës, duhet të shkoj në shtëpi një orë e më parë.
Kosova ka nevojë për zgjedhje të reja, nga të cilat, qytetarët me votën e tyre do të zgjedhin një Qeveri kredibile e cila do ta kthej vendin në rrugën e duhur drejt integrimit euro-atlantik.
Ditën e sotme deputetët e Partisë Demokratike të Kosovës goditën me grushta ministrat dhe kryeministrin Albin Kurti, i cili po mbante fjalën e tij në Foltoren e Kuvendit.
Lidhur me këtë ngjarje reagoi edhe kryeministri Edi Rama i cili doli në mbrojtje të kryeministrit Albin Kurti. Përmes një postimi Rama tha se opozita të distancohet nga kjo sjellje e turpshme dhe t’i shërbejë Kosovës me forcën e shembullit dhe jo me shembullin e forcës.
