Edhe një ditë e re në kryeqytetin amerikan, edhe një ditë e mbushur me takime të nivelit më të lartë të administratës së re amerikane nën Presidencën Trump 2 nga afaristi Shkëlqim Devolli.
Aksionari i Devolli Corporation ka pasur një takim të veçantë me ambasadorin në ardhje amerikan në NATO, Matthew Whitaker.
Devolli e ka falënderuar ambasadorin për kontributin amerikan në kuadër të forcave paqeruajtëse të KFOR-it në Kosovë, duke theksuar edhe rëndësinë e madhe që Kosova sa më shpejtë të bëhet edhe pjesë e NATO-s.
Në Washington DC, sipërmarrësi kosovar ka zhvilluar takime edhe me senatorët, Ted Cruz dhe Dave McCormick, guvernatorin e Texasit, Greg Abbott, si dhe kongresistin Peter Sessions.
Në të gjitha këto takime, Devolli ka kërkuar vazhdimin e vëmendjes së theksuar të administratës amerikane nën Presidentin Donald Trump për Kosovën dhe rajonin. Poashtu, është folur për bashkëpunimin ekonomik dhe tregtar ndërmjet Kosovës dhe SHBA-së, me theks te veçantë te prodhimet Made in Kosova.
Kjo është dita e katërt e qëndrimit të Shkëlqim Devollit në SHBA, e mbushur me takime të shumta me zyrtarë të lartë amerikanë, në javën kur jep betimin Presidenti i ri amerikan, Donald Trump.
