Kevin De Bruyne përjetoi dje 90 minutat e fundit me Manchester City, pastaj lamtumirë.
Mesfushori belg 33-vjeçar do të largohet nga klubi anglez sapo të përfundojë sezoni në Premier League, pa marrë pjesë në Botërorin për Klube.
Plot një dekadë me klubin ku ka luajtur që nga dita kur erdhi nga Wolfsburg në vitin 2015, me të cilin ka fituar 19 trofe, përfshirë edhe Champions League e paharrueshëm të vitit 2023 në Stamboll.
Gjatë karrierës së tij të përkushtuar ndaj Cityt, belgu ka përjetuar edhe momente të vështira, si humbja në finalen e Ligës së Kampionëve kundër Chelseat, dy vite më herët se finalja e Stambollit, apo humbja e fundit në finalen e “FA Cup” ndaj Crystal Palace.
“Jam i lumtur për mënyrën si ka shkuar jeta ime këtu. Sigurisht që ka pasur ulje dhe ngritje gjatë kësaj kohe; në futboll ka suksese, dështime, lëndime dhe të tjera. Sidoqoftë, duhet t’i pranosh të gjitha, të mësosh edhe nga gjërat e vështira, sepse nuk mund të presësh që gjithçka të shkojë gjithmonë 100%”, – tha ai për kanalet zyrtare të klubit nga “Etihad”.
Një kujtim i pashlyeshëm me City është sigurisht fitorja e Ligës së Kampionëve në stadiumin “Ataturk” ndaj Interit, i pari në histori për klubin, falë golit të Rodrit. “Mendimi im i parë ishte: më në fund.Mendoj se kemi zhvilluar shumë ndeshje të mëdha në Champions, ka pasur shumë raste kur kemi thënë ‘si është e mundur’, pasi eliminoheshim për shkak të golave jashtë fushe ose në minutën e fundit. Për të qenë i sinqertë, mendoj se e kemi merituar”.
Dhe në fund ka pranuar: “E di që ndeshja kundër Interit nuk ishte shumë e bukur, por nëse i shikon të gjitha ndeshjet e tjera, kemi luajtur vërtet, vërtet mirë, por nuk fituam dot Champions-in”.
