Manchester United ndodhet në një moment kritik të sezonit, duke u përgatitur për finalen e “Europa League” kundër Tottenham Hotspur. Ndeshje që përbën shansin e fundit për të fituar një trofe dhe kualifikuar në Champions League pas një periudhe të vështirë në Premier League.
Në këtë situatë të ndërlikuar, David Beckham ka dhënë mendimin e tij të sinqertë dhe të drejtpërdrejtë për trajnerin Ruben Amorim, si dhe sfidat që përballon klubi i tij i zemrës. Beckham thekson rëndësinë e mbështetjes për trajnerin e ri:
“Amorim është një trajner i ri, që ka arritur suksese me Sportingun. Ka eksperiencë të gjerë për moshën e tij, ndaj mendoj se do të bëjë ndryshimet e nevojshme. Mendoj se duhet ta mbështesim dhe të blejmë lojtarët që ai dëshiron, por nuk jam i sigurt sa e realizueshme është kjo”.
Ai shton se trajneri portugez ka nevojë për mbështetje, që të implementojë filozofinë e tij të lojës dhe ndërtojë skuadrën që dëshiron, edhe pse ky proces kërkon kohë e përpjekje financiare. Beckham nuk kursen kritikat për stabilitetin e munguar në klub dhe efektet që kjo ka pasur gjatë sezonit: “Nuk ka qenë një sezon i madh, madje mendoj se është akt mirësie të them vetëm kaq. Kur nuk ka stabilitet në klub, kjo duket lehtë”.
Kjo frazë nënvizon një realitet të hidhur për Manchester United, që po kërkon të rimëkëmbet pas rezultateve zhgënjyese. Në lidhje me lojtarët dhe politikat e transferimeve, Beckham shprehet me vendosmëri kundër shitjes së elementëve kyç të skuadrës, sidomos kapitenit Bruno Fernandes:
“Do të doja të mendoja se kapiteni ynë nuk është në shitje. Ai ka qenë i jashtëzakonshëm. Ndonjëherë kemi qenë shumë kritikë ndaj disa lojtarëve të Manchester United, por kur kemi pasur nevojë që ata të dalin në ballë të skuadrës, e kanë bërë”.
Për më tepër, ai thekson rëndësinë e ruajtjes së lojtarëve të rinj të talentuar që janë rritur brenda klubit: “Gjithashtu nuk më pëlqen ideja e shitjes së lojtarëve të rinj që janë rritur te Manchester United. Nuk duhet t’i shesim vetëm për arsye ekonomike”.
Duke mbajtur parasysh këto fjalë, duket se për Manchester United ka ende një rrugë të gjatë përpara për të ndërtuar stabilitet dhe sukses, duke mbështetur trajnerin dhe duke ruajtur elementët kryesorë të skuadrës. Në prag të finales së “Europa League”, sfida është më e madhe se kurrë, teksa mbështetja e plotë për Ruben Amorim mund të bëjë ndryshimin vendimtar.
