Gjykata Themelore e Ferizajt në Kosovë ka dënuar me burgim të përjetshëm Dardan Krivaqën për vrasjen e Marigona Osmanit. Ndërsa, i dyshuari tjetër, Arbër Sejdiu, u dënua me 15 vjet burgim për vrasje të rëndë.
Gjyqtari i rastit tha se për dënimin e Krivaqës është marrë parasysh edhe mosha shumë e re e Marigona Osmanit, e cila sapo kishte mbushur 18 vjeç.
“Më vjen keq se ç’ka ka ndodhur, që kam lëndu kaq shumë. Çkado të them nuk ka vlerë. Më shumë se unë nuk ka mujtë me e dasht askush, e më shumë se m’u ka dhimbtë mua, nuk e besoj që askujt. Kisha dhënë gjithçka me e kthy kohën pas”- tha i dënuari Krivaqa.
Kujtojmë se gjatë seancës së 1 gushtit, babai i Marigonës shpërtheu në të shara në sallën e gjyqit, ndaj avokatit të Krivaqës. Kjo pasi ky i fundit tregoi se ishte lincuar publikisht për mbrojtjen e Krivaqës.
“Lidhur me këtë çështje kam 1800 SMS, 600 prej të cilave uronin që bashkëshortja ime ta kishte fatin e njëjtë si të Marigonës, 300 prej tyre dëshironin që vajza ime ta ketë të njëjtin fat.”- tha avokati i Dardanit.
Nga ana tjetër, avokati në krah të babait të Marigonës tregoi se vrasja ishte akoma më makabre nga ç’e përshkruajti prokurori:
“Edhe më keq, edhe më vrazhdë, edhe më trishtuese se që po thotë prokurori. Lëndimet e saj janë 12 thyerje, thyerje e palcës kurrizore, gjakderdhje në kokë, lëndim në syrin e majtë, syrin e djathtë, kofshën e majtë, kofshën e djathtë, lëndime te qafa edhe më poshtë, lëndime në shpinë. Pra, ka qenë një vrasje shumë mizore.”
E reja u vra më 22 gusht të vitit 2021 në banesën e të akuzuarit kryesor, Dardan Krivaqa, në qytetin e Ferizajt. Më 21 gusht 2021, rreth orës 10:14, në banesën e tij, pa pëlqimin e të ndjerës Marigona Osmani, Dardani e kishte detyruar atë të kryente marrëdhënie seksuale dhe e kishte abuzuar e keqtrajtuar në forma të ndryshme.
