Qyteti bregdetar i Malaga-s dhe zona përreth u mbuluan nga një shtresë e bardhë breshëri dhe dëbore pas një stuhie të rrallë që goditi Spanjën. Pamjet tregojnë rrugë të përmbytura dhe reshje të mëdha breshëri në Alhaurín el Grande, Campanillas, Puerto de la Torre dhe Teatinos.
Agjencia spanjolle e meteorologjisë, Aemet, lëshoi paralajmërime për reshje të dendura dhe breshër, ndërsa stuhia Martinho solli dëborë në Parkun Kombëtar Sierra de las Nieves dhe Torcal de Antequera, duke krijuar një peizazh spektakolar.
Ndërkohë, reshjet ekstreme kanë shkaktuar përmbytje edhe në juglindje të vendit. Në Murcia, shirat e dendur përmbytën rrugë dhe qendra tregtare. Ekipet e emergjencës shpëtuan disa persona të bllokuar në makina dhe varka.
Një tornado e fuqishme goditi Alicante, duke shkaktuar dëme të mëdha në një shtëpi të një familjeje britanike. Pamjet tregojnë sesi erërat e forta shkatërruan gardhe, panele diellore dhe çati.
Situata ekstreme ka prekur edhe Ishujt Kanarie, ku reshjet e rrëmbyeshme kanë përmbytur rrugët dhe shumë automjete përfunduan në det.
