Të martën, reshje të dendura shkaktuan përmbytje të mëdha në zonën malore të Uttarkashi, në shtetin verior indian të Uttarakhand, duke përfshirë fshatin turistik Dharali. Ujërat e furishme përmbytën rrugë, ndërtesa dhe shkaktuan dëme të mëdha materiale. Më shumë se 100 persona rezultojnë të zhdukur, përfshirë të paktën 10 ushtarë nga baza ushtarake në Harsil.
Derimë tani, 130 persona janë shpëtuar, por katër persona janë konfirmuar të vdekur dhe trupat ende nuk janë gjetur. Operacionet e kërkim-shpëtimit po përballen me vështirësi të mëdha për shkak të rrëshqitjeve të dheut, rrugëve të dëmtuara dhe motit të keq që vazhdon.
Rritja e papritur e nivelit të lumit Kheerganga shkaktoi përmbytjen, ndërsa lumi Bhagirathi është bllokuar nga balta dhe rrënojat, duke formuar një liqen artificial, që përmbyti edhe një helipad qeveritar. Kjo paraqet rrezik për zonat e banuara përreth.
Autoritetet kanë paralajmëruar për reshje të tjera dhe kanë mbyllur shkollat në disa zona. Komunikimi me ekipet në terren është i pamundur për shkak të ndërprerjes së energjisë dhe sinjalit. Ngjarja rikujton përmbytjet katastrofike të vitit 2013, kur mijëra persona humbën jetën në të njëjtin rajon.
