Kandidati për president të Serbisë, Nenad Çanak thekson se Serbia e ka humbur prej kohësh Kosovën. Gjatë një interviste për gazetën “Zëri”, ai ka thënë se retorika aktuale politike në Serbi nuk dallon shumë nga ajo e Millosheviçit.
Ai premton se nëse zgjidhet në krye të shtetit serb do ta iniciojë ndryshimin e Kushtetutës, në të cilën Kosova nuk do të ishte e pranishme sepse, sipas tij, nuk është pjesë e Serbisë. Çanak po ashtu synon t’i japë autonomi Vojvodinës, Shumadisë dhe Sanxhakut.
‘‘Është shumë e rëndësishme që të futet në kokën e njerëzve në Serbi se Kosova është e humbur për ta dhe kjo ka ndodhur për dy arsye. E para, për shkak të politikave të gabuara të shtetit serb ndaj shqiptarëve për vite me radhë dhe e dyta, sepse Serbia e ka humbur luftën më 1999-n.’’
Madje sipas bashkëthemeluesit të partisë së qendrës së majtë, Liga e Social-Demokratëve të Vojvodinës, një ndër tri prioritetet e tij nëse do të zgjidhet president i Serbisë do të ishte ndryshimi i kushtetutës së shtetit serb, në të cilën Kosova nuk do të ishte pjesë e saj.
Në mesin e prioriteteve ai ka edhe krijimin e një samiti me të gjithë presidentët dhe kryeministrat e rajonit për të gjetur zgjidhje për të gjitha çështjet “pezull” dhe “pyetjet e hapura” të cilat i kanë shtetet në mes vete. I pyetur nëse kundërkandidati i tij për president, kryeministri aktual Aleksandër Vuçiç, zgjidhet në krye të shtetit serb, a do të njohë pavarësinë e Kosovës, ai ka thënë se si një politikan pragmatik që është, Vuçiç do të bëjë gjithçka përveçse ta thotë haptazi se Kosova është e pavarur.
