200 ushtarë nga ushtria britanike kanë mbërritur në Kosovë si përforcimi i KFOR, për të mbajtur nën kontroll situatën në veri.
Kjo vjen pas përshkallëzimit të tensioneve mes Kosovës dhe Serbisë, pas sulmit në Manastirin e Banjskës nga terroristët serbë, ku humbi jetën efektivi i Policisë kosovare Afrim Bunjaku.
Lajmin e ka bërë të ditur Shtabi Suprem i Fuqive Aleate në Evropë përmes një postimi në X, ku njofton se “200 ushtarë të Ushtrisë Britanike po mbërrijnë në Kosovë për të përforcuar misionin paqeruajtës të NATO-s në Kosovë”.
“Dyqind ushtarë të Ushtrisë Britanike po mbërrijnë në Kosovë për të përforcuar misionin paqeruajtës të Forcave të Kosovës (KFOR) të NATO-s. Dislokimi vjen pas sulmit të dhunshëm ndaj Policisë së Kosovës më 24 shtator”, thuhet në njoftim.
Sakaq, tashmë Britania e Madhe ka 400 ushtarë në detyrë për misionin paqeruajtës të NATO në Kosovë, me kërkesë të komandantit suprem të Aleancës për Evropën, SACEUR, gjeneralit amerikan Chris Cavoli. KFOR-i ka aktualisht rreth 4.500 trupa në Kosovë nga 27 shtete të NATO-s dhe shtetet partnere.
Më herët, komandati i KFOR, Angelo Ristuccia tha se situata në veri të Kosovës mund të përshkallëzohet shumë lehtë, referuar sulmit terrorist në Banjskë nga forcat serbe ku humbi jetën efektivi Afrim Bunjaku.
Ristuccia tha në një konferencë për mediet e Kosovës se të gjitha këto ngjarje tregojnë se situata mbetet e paqëndrueshme, duke bërë me dije se për shkak të ngjarjeve të fundit, KFOR ka shtuar praninë dhe veprimtaritë në Kosovë.
Gjithashtu ai bëri me dije se NATO ka autorizuar shtimin e forcave shtesë të misionit paqeruajtës për të mbajtur nën kontroll situatën. Përsa i përket sulmit të 24 shtatorit, gjeneralmajori tha se qëllimi ishte që të krijohet një destabilitet dhe kaos.
