Partizani është një nga klubet që ka investuar më së shumti në blerjen e lojtarëve në vitet e fundit. Klubi i kuq thuajse në çdo merkato ka pikasur të rinj të talentuar nëpër ekipet e tjera dhe nuk është kursyer për t’i blerë dhe për t’i bërë pjesë të ekipit.
Në të tillë mënyrë, të kuqtë kanë vepruar për plot tetë lojtarë, që janë aktualisht pjesë e skuadrës dhe një pjesë e tyre luajnë edhe si titullarë.
SHPENZIMET – Duke iu referuar shifrave që kemi arritur të mësojmë në rrugë jozyrtare, për skuadrën aktuale Partizani ka shpenzuar afro 405 mijë euro për blerjen e këtyre futbollistëve, duke pasur parasysh vetëm paratë që kanë shkuar për klubet.
Të kuqtë, tetë futbollistë i është dashur t’i blejnë, ndërsa pjesën tjetër kanë arritur t’i sigurojnë si lojtarë me parametra zero. Blerja më e shtrenjtë është ajo e Mehmetit, të cilin të kuqtë e morën nga Erzeni dy vite më parë për plot 100 mijë euro. Megjithatë, ende mesfushori nuk duket të jetë ngjitur në nivelin e pritshëm, i ndalur shumë shpesh nga dëmtimet. Pas tij vjen Pano Qirko, gardiani i kuq, që duhet thënë se ka bërë një sezon të mirë, pavarësisht vështirësive të skuadrës.
RAPORTI – Partizani në këtë sezon në 36 javë të luajtura, arriti të fitojë vetëm 14 prej ndeshjeve, një statistikë që padyshim është hasur pak për të kuqtë që nga 2013, kur u kthyen në Kategorinë Superiore. Dhe nëse do të bënim një llogari të thjeshtë, që padyshim është hipotetike, të kuqtë “kanë paguar” afro 30 mijë euro për çdo fitore të arritur në këtë sezon në Kategorinë Superiore.
Theksojmë se ky është thjesht një raport, por mjafton për të vlerësuar mungesën e efektivitetit dhe faktin se lojtarët e blerë nuk kanë ndihmuar dot në ruajtjen e balancave brenda ekipit. Padyshim, ka edhe përjashtime, por në tërësi përfundimi është ky. Gjatë merkatos së fundit, të kuqtë shpenzuan 50 mijë euro për nigerianin Ogunleje, që deri më tani është përdorur vetëm në Kategorinë e Tretë me Partizanin B.
