Presidenti i SHBA-së, Donald Trump zhvilloi një bisedë telefonike me homologun ukrainas Volodymyr Zelensky mbrëmjen e së mërkurës. Kjo u raportua nga gazetari i Axios, Barak Ravid, por nuk ka ende detaje mbi bisedën.
Komunikimi telefonik i tyre vjen në vazhdën e bisedimeve për t’i dhënë fund luftës në Ukrainë.
Zelenksy njoftoi më herët se, të enjten kreu i delegacionit negociues ukrainas, Rustem Umerov, do të takohet me palën amerikane dhe do të diskutojë tre çështje aktuale për Ukrainën.
Palët do të përgatiten për një takim tre palësh më pas me pjesëmarrjen e zyrtarëve rusë, që pritet të mbahet në fillim të marsit.
Rusia nisi pushtimin e saj në shkallë të plotë të Ukrainës më 24 shkurt 2022, duke nisur luftën më vdekjeprurëse në Evropë që nga Lufta e Dytë Botërore.
Lufta ka vrarë mijëra civilë dhe personel ushtarak nga të dyja palët. Miliona refugjatë janë larguar nga Ukraina, ku zona të gjera janë shkatërruar nga luftimet.
