Kampionët e Bundesligës në Gjermani, Bayern Munich njoftuan nënshkrimin me Jonathan Tah (29 vjeç) si transferim falas nga rivalët Bayer Leverkusen. Pas 10 vitesh me ‘Aspirinat’, Jonathan Tah i është bashkuar rivalëve të ligës, Bayern, ku do të ofrojë përvojën e tij në mbrojtje.
Fjalët për një lëvizje në Bavari kishin qarkulluar prej disa javësh. Transferimi i Tah u bë më i prekshëm të mërkurën pas raportimeve për vizitat mjekësore dhe praninë e tij në selinë e Bayernit. Mbrojtësi ka firmosur me Bayernin deri në qershor 2029.
Në njoftimin për shtyp të klubit gjerman, Tah tha se ishte i lumtur me këtë lëvizje.
Dua të marr përgjegjësi këtu dhe të punoj shumë çdo ditë në mënyrë që të kemi sukses si ekip dhe të fitojmë shumë trofe së bashku. Jam shumë i lumtur që ndodhem këtu”, tha Tah mes të tjerash.
I dalë nga moshat e Hamburg, Tah luajti gjithashtu në ekipin e parë përpara se të transferohej te Leverkusen në vitin 2015. Te Bayer ai luajti 402 ndeshje dhe mbajti shiritin e kapitenit. I thirrur në ekipin kombëtar gjerman në vitin 2016, ai ka bërë 35 paraqitje për ‘Panzerat’ deri më sot.
Drejtori ekzekutiv i Bayernit, Jan-Christian Dreesen tha se janë të kënaqur që ia dolën të afrojnë në ekip një futbollist me cilësi.
“Jemi të kënaqur të mirëpresim Jonathan Tah te FC Bayern. Si një lojtar ndërkombëtar me përvojë dhe lider, ai sjell qëndrueshmërinë dhe cilësinë që do të forcojë mbrojtjen tonë. Ai është lojtar që na përshtatet dhe gjithashtu ka provuar se mund të fitojë tituj”, tha drejtori i bavarezëve.
