Kreu i opozitës, Lulzim Basha, duke iu drejtuar kreut të qeverisë, Edi Rama, tha se nuk do të ketë zgjedhje më 18 qershor pa realizuar më parë qeverinë teknike.
Sipas Bashës, vetëm qeveria teknike do të ketë të gjithë kohën në dispozicion për të garantuar votën e lirë.
Ai paralajmëroi çrrënjosjen e koalicionit të 1 prillit, të cilin e akuzoi për lidhje me krimin. Basha tha se shqiptarët nuk do të pranojnë më të trajtohen si budallenj.
“Budalla është ai që pranon të trajtohet si budalla dhe shqiptarët kanë vendosur që të mos pranojnë më të trajtohet si të tillë nga një bandë kriminelësh.”
Kreu i PD-së ngriti shqetësimin edhe për çmimin e naftës në vend, i cili është më i larti në rajon. Sipas Bashës, Rama jo që nuk mbajti premtimin për uljen e çmimit, por vendosi taksa që sollën rritje.
“Çmimi i naftës në Shqipëri është më i larti në rajon, fuqia blerëse është më e ulta në rajon. Kjo e shtyu Ramën të premtonte uljen e çmimit të naftës, por, ju e dini fare mirë që nuk bëri asgjë.
A nuk ishte Edi Rama që rriti dy herë akcizën mbi hidrokarburet? Sot, çdo litër naftë është 240 lekë më e shtrenjtë jo për shkak të tregjeve, por për shkak të kryemashtruesit”, tha Basha.
