Asgjë e re përveç heshtjes te Tirana. Pas largimit të Bledi Shkëmbit, klubi ‘bardheblu’ ende nuk ka ka zyrtarizuar trajnerin e ri, ndërsa po ashtu asnjë lojtar nuk është afruar deri më tani në skuadër.
Muaji qershor po mbyllet, ndërsa te Tirana ende nuk ka nisur puna për sezonin e ri. Deri më tani ka vetëm heshtje dhe asgjë të re brenda kampit bardheblu.
I vetmi reagim zyrtar nga ana e klubit është njoftimi për largimin e Bledi Shkëmbit nga pankina dhe vetëm kaq. Situata te kryeqytetasit nuk duket aspak entuaziaste për edicionin e ri. Drejtuesit ‘bardheblu’ janë ende në gjumë letargjik, teksa jemi drejt nisjes së sezonit të ri 2025-2026. Edhe pse Shkëmbi është larguar tashmë, klubi nuk ka bërë të ditur emrin e trajnerit të ri, që do të ulet në stolin ‘bardheblu’
Në medie të ndryshme, si dhe nga zëra pranë skuadër përfliten disa emra trajnerësh, por asgjë nuk është konkrete. Shpëtim Duro, Qatip Osmani, Ardian Nuhiu, Ditmar Bicaj, apo edhe ish-trajneri i Vllaznisë, Thomas Brdariç e ish-tekniku i Laçit, Francesco Moriero, janë disa prej kandidatëve për të marrë timonin e drejtimit të ekipit kryeqytetas.
Gjithsesi për sa kohë që nuk ka ende një zyrtarizim nga vetë klubi, çdo gjë i mbetet kuadrit të thashethemeve.
Por përtej faktit që ende nuk është konfirmuar trajneri i ri, tifozët ‘bardheblu’ janë të shqetësuar edhe prej mungesës së afrimeve në skuadër. Asnjë lojtar i ri nuk i është bashkuar ekipit deri më tani, teksa klubet e tjera të Superligës shqiptare kanë nisur prej kohësh nga puna, për t’u përforcuar për edicionin e ri 2025-2026.
Skuadra ka nevojë për riformatim dhe emra cilësorë që do të formojnë ekipin për sezonin e ri, kjo pasi u vu re edhe në sezonin që u mbyll, ku ‘bardheblutë’ evituan katastrofën në fund, duke qëndruar në kategori përmes play-out-it. Deri më tani dihen vetëm largimet e Prengajt, Harizajt, Bajroviç dhe Ndrecës, por afrime ende asnjë.
Gjithsesi, mbetet për tu parë se çfarë do të ndodhë te Tirana, pasi të kenë zyrtarizuar fillimisht trajnerin e ri.
