Presidenti i Ekuadorit, Daniel Noboa, ka njoftuar të mërkurën se autoritetet kanë kapur njeriun më të kërkuar në vend, Jose Adolfo Macias, i njohur ndryshe si “Fito”. Ai ishte në kërkim prej janarit të këtij viti, pasi u arratis nga një burg me siguri të lartë në Guayaquil, ku po vuante një dënim prej 34 vitesh për vrasje dhe trafik ndërkombëtar droge.
Arratisja e tij shkaktoi një valë dhune të paparë në vend, duke çuar në shpalljen e një “konflikti të brendshëm të armatosur” nga presidenti Noboa. Qeveria e Ekuadorit shpalli grupin Los Choneros dhe 21 banda të tjera kriminale si organizata terroriste, duke nisur një ofensivë të gjerë kundër krimit të organizuar.
Në shkurt 2024, Departamenti Amerikan i Thesarit vendosi sanksione ndaj Macias dhe bandës së tij, për shkak të aktiviteteve të tyre të dhunshme dhe trafikimit të drogës në të gjithë Amerikën Latine.
Pas arrestimit, presidenti Noboa deklaroi se autoritetet ekzekutive po punojnë për të ekstraduar “Fiton” drejt Shteteve të Bashkuara të Amerikës dhe aktualisht janë në pritje të një përgjigjeje zyrtare nga pala amerikane.
Kapja e “Fitos” përbën një goditje të fortë ndaj krimit të organizuar në Ekuador, ndërsa qeveria Noboa vazhdon përpjekjet për të rivendosur rendin dhe sigurinë në një vend që vitet e fundit është përballur me rritje të ndjeshme të dhunës dhe trafikut të drogës.
