Gjatë një vizite të presidentit ukrainas Volodymyr Zelensky në Gjermani, Kancelari gjerman, Friedrich Merz tha se Berlini do të ndihmojë Kievin të zhvillojë armë të reja me rreze të gjatë që mund të godasin objektivat në territorin rus, raportoi AFP.
Prodhimi i armëve me rreze të gjatë “mund të bëhet si në Ukrainë ashtu edhe këtu në Gjermani”, ka thënë më tutje Merz. “Ministrat tanë të Mbrojtjes do të nënshkruajnë sot një memorandum mirëkuptimi në lidhje me prokurimin e sistemeve të armëve me rreze të gjatë të prodhuara në Ukrainë”, ka thënë Merz, pa përmendur prodhuesit e përfshirë.
“Nuk do të ketë kufizime në distancë, duke lejuar Ukrainën të mbrohet plotësisht, madje edhe kundër objektivave ushtarake jashtë territorit të saj”, ka shtuar ai në një konferencë të përbashkët për shtyp.
“Ne nuk do të japim asnjë detaj të mëtejshëm deri në një njoftim të dytë”, ka shtuar kancelari gjerman. Kancelari gjerman e ka përshëndetur projektin si fillimin e një forme të re të bashkëpunimit ushtarako-industrial midis dy vendeve.
