Anglia do të vuajë tre mungesa të rëndësishme në dy sfidat e muajit nëntor, ndaj Serbisë dhe Shqipërisë.
Dëmtimet e kundërshtarëve cilësohen si lajme të mira në kampin e Kombëtares shqiptare, e cila ka hyrë tashmë në sprintin final drejt kualifikimit në play-off të Botërorit, rrugëtim që nuk varet vetëm nga skuadra e Sylvinhos.
Përveç përballjes me Andorrën, kuqezinjtë do të luajnë edhe 90 minutat vendimtare të dielën ndaj Anglisë, takim që do të përcaktojë fatin e kualifikimit.
“Të tre Luanët” nuk do të kenë në dispozicion tre futbollistë tepër të rëndësishëm për skemat e trajnerit Thomas Tuchel.
Për shkak dëmtimi, nga grumbullimi janë larguar Marc Guehi, Nick Pope dhe Anthony Gordon, të cilët do të mungojnë si në ndeshjen ndaj Serbisë, ashtu edhe në atë kundër Shqipërisë.
Treshja pritej të ishte titullare në të dy sfidat, por mungesa e tyre nuk pritet të ndikojë në objektivat e Anglisë, që e ka siguruar tashmë kualifikimin në Kupën e Botës 2026.
Skuadra e Tuchel ka fituar të gjitha gjashtë ndeshjet e deritanishme në Grupin K kualifikues, duke e ndjekur me qetësi garën mes Shqipërisë dhe Serbisë për vendin e dytë në grup.
Dy kombëtaret ballkanase ndahen me vetëm një pikë diferencë, duke e bërë edhe më të fortë dhe intriguese garën në 180 minutat e fundit.
