Barazimi me Bylisin në një ndeshje direkte për fundin e renditjes duket se ka lënë shije të keqe tek korçarët që nuk kanë mundur të përfitojnë nga mënyra se si shkoi ndeshja dhe kanë lënë dy pikë të rëndësishme në këtë takim.
Kjo ka qenë ajo që ka mërzitur më shumë trajnerin Ernest Gjoka, i cili menjëherë pas këtij takimi nuk ka humbur kohë dhe ka filluar përgatitjet për ndeshjen e radhës ndaj Elbasanit që do të luhet sërish në Korçë. Në planin e punës së trajnerit kryeqytetas gjithçka ka nisur me një analizë me grupin e lojtarëve të cilëve u ka vënë në dukje gabimet e shumta në finalizim dhe në menaxhimin e rezultatit.
Sidomos në prapavijë Gjoka ka pasur kritika për të tijat duke i kërkuar që të jenë më të vëmendshëm dhe të shmangin daljet në aventurë gjatë 90 minutave të takimit. Më pas trajneri ka dashur të rimëkëmbë moralin e lojtarëve duke u treguar se asgjë nuk ka mbaruar dhe se ekipi është gati për të luajtur një tjetër finale për të këtë sezon atë ndaj Elbasanit në shtëpi, takim në të cilin bardhekuqtë duhet të marrin pikët maksimale për të mos rrezikuar fundosjen në vendin e fundit të klasifikimit.
RIKUPERIMET – Përtej situatës së pikëve dhe të ndeshjeve të fundit që shkuan një fazë pa fitore, ajo që sjell disi buzëqeshje në kampin bardhekuq është rikuperimi i dy pikave shumë të rëndësishme të ekipit siç janë kapiteni Prençi dhe mbrojtësi Albi Doka. Me Prençin që do të rikthehet nga minuta e parë në këtë takim Gjoka ka si qëllim që të forcojë repartin e prapavijës me një lojtar cilësor që i ka munguar korçarëve për disa javë.
Nga ana tjetër e njëjta gjë mund të flitet edhe për Dokën. Cilësia dhe eksperienca e madhe e mbrojtësit tiranas pritet që të jetë një armë më shumë për trajnerin para ndeshjes së fundit të 2024 ndaj Elbasanit. Në kushte të tilla ditën e sotme pritet që Gjoka të provojë për herë të parë mënyrën se si do të luajë me këta lojtarë në fushë nëse do të tregohet sërish besnik i 4-3-3 apo mund të kalojë në një reshtim 3-5-2 për të pasur më shumë siguri në prapavijë.
