Ambasadorja e BE-së në Tiranë, Romana Vlahutin, kritikoi ashpër ritmin e punimeve në shëtitoren e Vlorës.
Në një deklaratë për mediat, së bashku me kryebashkiakun e Vlorës, Vlahutin “i tërhoqi” veshin kompanisë, për ngadalësinë e punimeve që po kryen në Lungomare.
Gjithashtu, ambasadorja e BE-së pohoi se i ka kërkuar kompanisë t’i japë një program ditor për të parë se çfarë punimesh janë bërë.
“Ishte nje takim i vështirë me kompanitë që po bëjnë punimet në këtë zonë. Unë kam ardhur në Vlorë në fund të janarit dhe atëherë m’u dhanë të gjitha garancitë se punimet do të përfundonin deri në datën 30 prill. Për ne kjo datë do të mbetet data ku të gjitha detyrimet që ekzistojnë në kontratë do të përfundojnë.
Unë dua që të mbetem optimiste, por do të mbetem optimiste me kujdes të madh, ka ende shumë punë për t’u bërë për Lungomaren. Ne kemi rënë dakord që kompania të na japë një program ditor, në mënyrë që ne të shikojmë se çfarë punimesh janë bërë dhe çfarë ritmi ka pasur puna.
Ne, si Bashkim Europian, kemi dhënë shuma të mëdha parash që banorët e Vlorës, por edhe vizitorët të mund të shijojnë këtë pjesë të Shqipërisë – tha Vlahutin .
Ndërsa, kryebashkiaku i Vlorës, Dritan Leli vlerësoi me superlativë mbështetjen dhe fondet që ka dhënë Bashkimi Europian për këtë qytet.
Tirana Today
