Dhuna e rëndë e ushtruar ndaj blogeres Klea Prenga nga dy motrat Antonela Berisha dhe Mariela Berisha, është tashmë nën hetim nga organet ligjzbatuese. Episodi i rëndë i shënuar në kryeqytet, dy net më parë, i ka shkaktuar plagë të rënda 24-vjeçares Klea Prenga, e cila sulmin e bëri publik me video dhe foto tronditëse.
Sipas rrëfimit publik në llogarinë e saj, Klea po darkonte në një restorant në kryeqytet kur është sulmuar fillimisht me grushte dhe më pas edhe me një gotë qelqi në fytyrë.
Shkak i dhunës barbare që motrat Antonela dhe Mariela Berisha ushtruan mbi blogeren Klea Prenga mendohet se është bërë dyshimi i Marielës se Klea kishte lidhje me bashkëshortin e saj, prej të paktën një viti. Prenga ka qenë duke darkuar në një restorant në zonën e Kodrës së Diellit në Tiranë, kur dy motrat janë afruar dhe kanë nisur ta godasin me sende të forta në fytyrë, duke i shkaktuar dëmtime të shumta.
Po çfarë deklaroi blogerja para hetuesve
Mësohet se Klea Prenga nuk ka treguar asgjë mbi arsyet e dhunës, madje ajo ka pretenduar se nuk ka dijeni për arsyen e sulmit të motrave Berisha. Agjentët e Komisariatit nr. 1 kanë kryer disa kontrolle në kërkim të dy motrave, por deri tani nuk janë gjetur. Ato akuzohen për plagosje të rëndë me dashje, të kryer në bashkëpunim, vepër e cila mund t’u rrezikojë atyre deri në 10 vjet burg.
Klea Prenga, edhe sot bëri një publikim tjetër në llogarinë e saj për të sqaruar qëndrimin që do të mbajë në vazhdim.
REAGIMI I PRENGES
Akuza të rënda dhe përmendja e emrave pa e ditur situatën janë të tepërta dhe të papërgjegjshme. Kur dikush më sulmoi pa të drejtë, duke sjellë akuza të pabaza dhe duke ndërhyrë në jetën time, ndjeva që është e nevojshme të mbrohem. Personi që më sulmoi nuk ka burrë dhe as nuk i ka ndërhyrë dikush në familje. Megjithatë, kjo situatë më kujton se femrat me vetëbesim të ulët, shpesh besojnë se gjithçka mund të merret me forcë. Ato nuk arrijnë të kuptojnë se fuqia e vërtetë vjen nga qëndrimi me dinjitet, nga zgjedhja për të mos u ulur në të njëjtin nivel me ata që përhapin negativitet.
Është e rëndësishme të kuptojmë se sjellja e tyre reflekton më shumë për to sesa për ne. Njerëzit që sulmojnë të tjerët, shpeshherë e bëjnë këtë për të mbulur pasiguritë e tyre, për të shmangur reflektimin mbi problemet e veta. Ata që mendojnë se gjithçka merret me forcë, zakonisht janë ata që nuk kanë njohur asnjëherë fuqinë e komunikimit të hapur, të ndershëm dhe të respektueshëm.
Në vend që të lejoj që këto sulme të ndikojnë tek unë, unë zgjedh të qëndroj e fortë, e qetë dhe e vetëdijshme për vlerën time. Nuk ka nevojë të përfshihem në lojërat e tyre të vogla. Unë do të vazhdoj përpara me kokën lart, duke u përqëndruar tek vetja dhe njerëzit që më mbështesin, dhe duke mos lejuar që negativiteti të më rrëzojë.
