Autoriteti Kombëtar i Ushqimit përmes një deklarate për shtyp thekson se ka bërë analizat e mishit të ndaluar që importohet nga Brazili.
AKU kërkon të qetësojë konsumatorët duke thënë se parametrat e këtij produkti janë brenda normave të lejuara. Ndërkohë që nuk jep asnjë të dhënë rreth këtij pretendimi.
‘‘Pas bllokimit të mishit që importohej nga Brazili, Autoriteti Kombëtar i Ushqimit mori mostrat për të bërë analizat e këtij produkti. Mostrat janë çuar në laboratorët e AKU-së, por edhe në laboratorin e referencës pranë ISUV. Nga përgjigjet e analizave të ardhura nga laboratorët e AKU-së rezulton se parametrat e mishit që ka ardhur nga Brazili, janë brenda normave të lejuara nga ligji. Meqenëse kanë dalë vetëm përgjigjet e analizave nga laboratorët e AKU-së, produkti do të vijojë të qëndrojë i bllokuar deri në daljen e analizave edhe nga laboratori i referencës pranë ISUV.’’
