Një fëmijë 7-vjeçar shqiptar ka ndërruar jetë në një aksident të rëndë rrugor mbrëmjen e djeshme në provincën e Bolonjës.
Sipas mediave italiane, aksidenti ndodhi rreth orës 21:00, kur një makinë tip Volkswagen Corrado që drejtohej nga shqiptar 34-vjeç, ndërsa në sediljen e pasme ishte djali i tij, u përplas fort me një Renault Clio të drejtuar nga një 20-vjeçar.
Ende nuk dihen identitetet e personave të përfshirë në aksident.
Sipas të dhënave të para, një nga automjetet dyshohet se ka kaluar në korsinë tjetër për të shmangur një skuter që po kthehej drejt një stacioni karburanti, duke shkaktuar përplasjen e fortë.
Mësohet se dy automjetet dolën jashtë rruge, ndërsa fatkeqësisht 7-vjeçari ndërroi jetë në vend. Në aksident u plagosën babai i tij, me origjinë shqiptare, banues në Minerbio, si dhe drejtuesi i makinës tjetër.
Në vendngjarje kanë shkuar karabinierët, të cilët po kryejnë hetimet për të sqaruar me detaje dinamikën e aksidentit. Paraprakisht raportohet se fëmija që ndodhej në sediljen e pasme, nuk kishte vendosur rripin e sigurimit.
