Një aksident i rëndë ndodhi të premten kur një autobus turistik me rreth 50 pasagjerë që po kthehej nga Ujëvara e Niagarës drejt New York City u përplas në një kanal, duke shkaktuar vdekje të shumë personave, përfshirë fëmijë, njoftoi policia e shtetit të New York-ut.
Autobusi u përmbys pasi humbi kontrollin për “arsye të panjohura”, duke plagosur disa persona, tha zëdhënësi i policisë së New York-ut, James O’Callaghan, në një konferencë për media.
Disa udhëtarë mbetën të bllokuar brenda autobusit, ndërsa të tjerë u hodhën jashtë, shtoi ai. Autoritetet po vazhdojnë operacionet e shpëtimit dhe situata mbetet aktive.
Aksidenti ndodhi pranë qytetit Pembroke, në autostradën Interstate 90 drejt lindjes, rreth 40 kilometra nga Buffalo, njoftoi policia e shtetit.
Guvernatorja e New York-ut, Kathy Hochul, e përshkroi aksidentin si “tragjik” dhe tha se ekipet e shpëtimit po punojnë për të ndihmuar dhe shpëtuar të gjithë të përfshirët.
Autostrada pranë vendit të aksidentit është mbyllur në të dy drejtimet, ndërsa pamjet live nga vendi i ngjarjes tregojnë autobusin të përmbysur dhe disa persona të mbledhur rreth tij.
