Gjermania po kalon një valë të fortë të ftohti. Mediat e huaja raportojnë se, edhe pse për shumicën e gjermanëve ëndrra për një “Krishtlindje të Bardhë” nuk u realizua, temperaturat ishin tejet të ulëta në të gjithë vendin, ndërsa shumë rrugë u mbuluan nga akulli.
Sipas Shërbimit Meteorologjik Gjerman (DWD), Krishtlindjet e vitit 2025 ishin më të ftohtat që nga viti 2010. Konkretisht, periudha nga 24 deri më 26 dhjetor rezultoi mesatarisht më e ftohta e 15 viteve të fundit në Gjermani.
Temperatura më e ulët u regjistrua natën e 26 dhjetorit, kur termometri shënoi -12.1 gradë Celsius në Malet Harz, konkretisht në Harzgerode, në landin e Saksonisë-Anhalt.
Në raportin e DWD theksohet se një Krishtlindje e bardhë u përjetua vetëm në pak rajone të vendit. Në disa zona të Bavarisë, reshjet shumë të lehta të dëborës në prag të Krishtlindjeve krijuan një peizazh të mbuluar pjesërisht me borë.
Megjithatë, sasi të mëdha dëbore u regjistruan vetëm në lartësi të mëdha malore: 75 centimetra në Zugspitze dhe 80 centimetra në Nebelhorn.
Ndërkohë, akulli shkaktoi probleme të shumta, veçanërisht për drejtuesit e automjeteve.
Dhjetëra aksidente u shënuan në Gjermaninë veriore për shkak të rrugëve të rrëshqitshme.
Situata ishte e ngjashme edhe në Berlin dhe Brandenburg, ndërsa shërbimet e autobusëve në Potsdam u pezulluan përkohësisht.
Dhomat e urgjencës të mbingarkuara
Gazeta Tagesspiegel raporton se që nga mbrëmja e së shtunës është vërejtur një mbingarkesë e madhe në repartet e urgjencës së disa spitaleve në Berlin.
Rëniet në trotuare dhe rrugë të mbuluara me akull kanë sjellë mbipopullimin e dhomave të urgjencës në katër spitale të kryeqytetit.
Sipas spitaleve, dëmtimet më të shpeshta kanë qenë thyerje të krahëve dhe këmbëve, si dhe lëndime në kokë, të shkaktuara nga rrëzimet në sipërfaqe të akullta.
Edhe sallat e operacionit dhe njësitë e kujdesit intensiv janë pranë kapacitetit maksimal, ndërsa koha e pritjes për pacientët është rritur ndjeshëm.
Nata e Vitit të Ri pa fishekzjarre?
“A po vjen ‘nata e frikës’? Debati mbi ndalimin e fishekzjarrëve në natën e Vitit të Ri” është titulli i një reportazhi të rrjetit BR24, i cili trajton debatin e vazhdueshëm mbi përdorimin e fishekzjarrëve në Gjermani.
Pak para nisjes së shitjes së fishekzjarrëve për Vitin e Ri, thirrjet për ndalimin e tyre janë intensifikuar. Presidenti i Shoqatës Mjekësore Gjermane, Klaus Reinhardt, kërkon ndalim të plotë të fishekzjarrëve privatë në Gjermani.
Ai thekson se shfaqjet e organizuara të fishekzjarrëve në hapësira qendrore janë të pranueshme, por përdorimi i pakontrolluar duhet të ndalohet.
Sipas Reinhardt, fishekzjarrët shkaktojnë çdo vit shumë lëndime dhe djegie, prodhojnë sasi të mëdha mbetjesh, rëndojnë sistemin shëndetësor dhe dëmtojnë mjedisin.
Ai shton se ato janë përdorur edhe kundër policisë dhe zjarrfikësve, si dhe mund të shkaktojnë frikë të madhe, madje edhe pasoja fatale, për refugjatët që kanë përjetuar luftë.
Edhe aktivistët për të drejtat e kafshëve paralajmërojnë se fishekzjarrët shkaktojnë stres dhe frikë si te kafshët shtëpiake ashtu edhe te ato të egra.
Presidenti i Shoqatës Mjekësore Gjermane u ka bërë thirrje ministrave të Brendshëm që “më në fund” të mbrojnë qytetarët nga rreziqet e fishekzjarrëve privatë, duke theksuar se kjo nuk lidhet me një “kulturë ndalimesh”, por me përgjegjësinë dhe pjekurinë e një shoqërie moderne.
Ndalimin e fishekzjarrëve e mbështet edhe ministri i Brendshëm, Alexander Dobrindt.
