Të paktën 13 persona kanë vdekur nga vala ekstreme e të nxehtit që ka përshirë jugun e Shteteve të Bashkuara të Amerikës në dy javët e fundit. Këtë e bënë të ditur dje zyrtarët amerikanë.
Numri më i madh i vdekjeve, gjegjësisht 11 persona, u regjistrua në Teksas, pranë kufirit me Meksikën. “Që nga e mërkura, ka pasur 11 vdekje gjithsej”, thanë zyrtarët lokalë në një deklaratë për AFP-në.
Një 14-vjeçar vdiq javën e kaluar kur po ecte në një park në Teksas, ku temperaturat arritën 48 gradë celsius. Në mënyrë tragjike, njerku i viktimës ka ndërruar jetë në një aksident automobilistik, teksa po nxitonte për ta shpëtuar djalin.
Ndërkohë një grua 62-vjeçare vdiq në shtetin fqinj të Luizianës javën e kaluar, pasi një stuhi la mijëra familje pa energji dhe rrjedhimisht pa ajër të kondicionuar, sipas zyrtarëve lokalë.
Ditët e fundit, temperaturat në disa qytete jugore të SHBA-së kanë qenë shumë të larta dhe autoritetet lokale në Teksas kanë ngritur disa qendra ftohjeje. Në Meksikë në dy javët e fundit kanë humbur jetën si pasojë e temperaturave të larta 100 njerëz. Në disa rajone temperaturat shkuan deri në 49 gradë Celcius.
