Pas prononcimit të kreut të grupit parlamentar të LSI-së, Luan Rama, i menjëhershëm ka qenë reagimi nga deputeti socialist, Taulant Balla.
Duke iu kundërpërgjigjur LSI-së, Balla pohoi se as Edi Rama dhe as Ilir Meta nuk vijnë nga Partia e Punës e Shqipërisë, por nga lëvizja demokratike e ’90-ës. Nënkryetari i Grupit Parlamentar të selisë rozë pohoi se PS nuk ka përgojuar asnjëherë asnjë ministër që është pjesë e LSI-së.
“Miqësisht i them mikut tim Luan Rama ta lërë retorikën e PPSH-së së vitit 1989, sepse as Edi Rama dhe as Ilir Meta nuk vijnë nga PPSH-ja e 1989-ës, po vijnë nga lëvizja demokratike për zgjedhje të lira në vitin 1990. Miqësisht Luan, miku im prej zgjedhjeve të vitit 1996, nuk të takon të bësh analistin e Partisë Socialiste dhe as gazetarin me ministrat e Partisë Socialiste, se nuk shkon më me këto mistrecllëqe mes nesh. Merr shembull nga Partia Socialiste e 2017-ës, që ka katër vjet në koalicion në partinë tënde dhe kurrë nuk ia ka lejuar vetes që të përgojojë ministrat e LSI-së. Gjej një rast ku unë si nënkryetar i Grupit Parlamentar të PS-së të kem përgojuar ndonjë ministër të LSI. Po kështu asnjë drejtues tjetër i PS-së”, tha Balla për “Balkan Web”.
Pas ‘këshillës’ që Balla i ka dhënë Ramës, ai sugjeroi së LSI ‘duhet ta lërë çadrën e PD-së në vetminë e madhe’.
“Miqësisht miku im Luan, sa për zgjedhjet e lira dhe pluraliste, jam shumë dakord me ty, të mos ia lini as çadrës as Çim Pekës! Lëreni çadrën në vetminë e madhe dhe të shkojmë tek populli për t’i dhënë fund estradave të turpshme të Saliut me popullin shqiptar”, përfundon reagimin Balla.
