FIFA ka caktuar arbitrin slloven Slavko Vincic për të drejtuar finalen e Kupës së Botës të së dielës mes Argjentinës dhe Spanjës. Ky vendim vjen gjashtë vjet pasi ai u ndalua gjatë një bastisjeje policore të përshkruar si një “festë seksi”. Zyrtari 46-vjeçar u përfshi në një operacion të vitit 2020 në qytetin e Bijeljinas, i cili synonte një tubim që autoritetet e cilësuan si të lidhur me drogën dhe prostitucionin.
Gjatë operacionit, policia ndaloi 35 persona, përfshirë nëntë gra dhe 26 burra, dhe raportohet se sekuestroi katër pako kokainë, 10 pistoleta, tre jelekë mbrojtës dhe më shumë se 11,000 dollarë kesh. Vincic u mor në pyetje si dëshmitar dhe më vonë u lirua pa akuza. Ai ka mohuar vazhdimisht çdo përfshirje në aktivitete të paligjshme.
Duke folur për gazetën sllovene “Vecer” pas incidentit, Vincic deklaroi se kishte udhëtuar në Bosnjë për një takim biznesi, i cili papritur e çoi atë në atë tubim. “Pranova një ftesë për drekë, e cila doli të ishte gabimi im më i madh,” tha ai, duke shtuar se as ai dhe as bashkëpunëtorët e tij të biznesit nuk i njihnin personat e arrestuar. Pavarësisht polemikave, karriera e Vincic si arbitër vazhdoi të përparonte.
Ai drejtoi finalen e Ligës së Kampionëve të UEFA-s 2024 mes Real Madridit dhe Borussia Dortmundit dhe ka arbitruar tashmë tre ndeshje në Kupën e Botës këtë verë. Ndeshja finale do të zhvillohet në stadiumin MetLife të New Jersey-t këtë të diel në orën 15:00, sipas kohës lokale të Bregut Lindor.
