Rama tha se Partia Socialiste është ajo forcë politike, që mban premtimet. Kreu i qeverisë shtoi se vendi ynë po ecën me hapa të shpejtë drejt integrimit evropian.
Më tej, premtoi dyfishimin e shpërblimit për prindërit e fëmijëve me aftësi të veçanta.
“Qeveria do të ndihmojë njerëzit, që janë me aftësi ndryshe. Shteti do ua paguajë sigurimet shoqërore. Do dyfishojmë shpërblimet për prindërit e fëmijëve me aftësi të veçanta. Po ngremë një ekonomi që po rrit mundësitë. Rritja vazhdon që të jetë e qëndrueshme. Shpresojmë që rritja ekonomike mos të goditet nga ajo që ndodh në arenën ndërkombëtare. Po rrisim prodhimin e energjisë”, u shpreh kreu i qeverisë.
Në fund, kryeministri Rama vlerësoi sektorin e turizmit, duke thënë se sot Shqipëria numëron 12 milionë turistë në vit. Sipas tij, kjo bën që edhe ekonomia të ketë rritje.
“Kemi sot 12 milionë turistë në vit. Të gjitha këto janë punësim më shumë dhe ekonomi që zhvillohet më shumë”, përfundoi Rama.
