Pas përjashtimit të papritur të Kristi Lamajt nga “Big Brother VIP Albania”, reagimi i parë publik ka ardhur nga Krusita, me të cilën ai kishte krijuar një lidhje të ngushtë brenda shtëpisë. Përmes një postimi në rrjetet sociale, ajo ka shprehur hapur habinë e saj, duke shkruar thjesht: “Pse, kur dhe si”.
Një reagim i shkurtër, por domethënës, që ka nxitur menjëherë komente dhe diskutime nga ndjekësit, të cilët e kanë interpretuar si shenjë tronditjeje dhe paqartësie ndaj vendimit të marrë nga produksioni.
Ndërkohë, gjatë mëngjesit të sotëm, “Vëllai i Madh” ka njoftuar zyrtarisht përjashtimin përfundimtar të Kristi Lamajt nga gara, përmes një Zarfi të Zi që mbërriti në shtëpi. Mes një atmosfere të tensionuar, zarfi u lexua nga banorja Brikena, e cila komunikoi vendimin e produksionit, ku theksohej se televotimi aktual anulohej menjëherë.
“Banorë, Vëllai i Madh ju njofton se Kristi Lamaj është përjashtuar përfundimisht nga gara. Televotimi aktual anulohet”, thuhej në mesazhin zyrtar.
Përjashtimi i Kristit vjen pas një sërë situatash të diskutueshme gjatë qëndrimit të tij në reality show. Kujtojmë se vetëm javën e kaluar ai kishte lënë shtëpinë duke kaluar murin rrethues, një veprim që solli largimin e tij të përkohshëm. Megjithatë, pas vendimit të publikut, Kristi u rikthye në shtëpi dhe në garë.
Pavarësisht këtij shansi të dytë, produksioni ka vendosur përjashtimin përfundimtar, duke i dhënë fund rrugëtimit të tij në BBVA. Mbetet për t’u parë se si ky vendim do të ndikojë në dinamikat e lojës dhe marrëdhëniet mes banorëve në ditët në vijim.
