Aeroporti ndërkombëtar i Berlinit ka njoftuar këtë të premte se fluturimet janë pezulluar përkohësisht në mëngjes për shkak të kushteve të rrezikshme të motit. Sipas një deklarate zyrtare, ngricat dhe akulli e kanë kanë bërë të pamundur ngritjen apo uljen e avionëve.
Që të enjten, shumë fluturime janë anuluar për shkak të shiut të ngrirë. Deutsche Welle shkruan se personeli i aeroportit punoi gjatë natës për të pastruar pistat, por sipërfaqet mbeten shumë të rrëshqitshme, duke vështirësuar rifillimin e fluturimeve.
Berlin Brandenburg është aeroporti i tretë më i ngarkuar në Gjermani pas qendrave ndërkombëtare të tranzitit në Frankfurt dhe Mynih. Ai ndodhet në qytetin Schönefeld, në jug të kryeqytetit gjerman dhe pjesë e shtetit të Brandenburgut lindor.
Një zëdhënëse e aeroportit tha se nuk dihet ende se kur do të rifillojnë fluturimet, pasi aeroporti po përballet me shi të vazhdueshëm dhe ngrica e akull. Ajo shtoi se, megjithëse personeli i aeroportit ka punuar gjatë natës për të pastruar pistat, kjo kishte rezultuar vetëm pjesërisht e suksesshme dhe sipërfaqet mbeten të rrëshqitshme.
Zëdhënësja këshilloi udhëtarët të kontrollojnë rregullisht statusin e fluturimeve para se të nisen për në aeroport.
Situata e motit ka shkaktuar gjithashtu ndërprerje të trafikut në veri dhe lindje të Gjermanisë. Në autostradën Autobahn 10 pranë Potsdamit, autoritetet raportuan disa aksidente me të paktën 19 të lënduar. Ndërprerje pati edhe në linjën hekurudhore midis Berlinit dhe Hamburgut.
Shërbimi meteorologjik kombëtar gjerman paralajmëron se situata pritet të përmirësohet gjatë ditës, me temperatura afër 0 gradë Celsius (32°F). Në pjesën jugore dhe perëndimore të vendit pritet mot më i butë, me temperatura që mund të arrijnë deri në 10 gradë Celsius përgjatë lumit Rin gjatë fundjavës.
