Presidenti i Këshillit Evropian, Antonio Costa, Presidentja e Komisionit Evropian, Ursula von der Leyen dhe Përfaqësuesja e Lartë për Politikën e Jashtme dhe Sigurinë, Kaja Kallas, përfaqësojnë Bashkimin Evropian në Samitin BE–Ballkani Perëndimor.
Ky samit synon të theksojë rëndësinë strategjike të marrëdhënieve politike dhe ekonomike mes Bashkimit Evropian dhe vendeve të Ballkanit Perëndimor, veçanërisht në kontekstin gjeopolitik. Samiti është mënyra për të treguar se Bashkimi Evropian ka angazhimin e tij të plotë dhe të qartë për perspektivën e anëtarësimit të Ballkanit Perëndimor në BE, si dhe progresin e arritur në procesin e zgjerimit. Rëndësia e përparimit konkret në reforma, përafrimit me legjislacionin evropian, bashkëpunimit rajonal dhe marrëdhënieve të mira fqinjësore janë çështjet e tjera që do të diskutohen mes liderëve.
Në fokus të samitit është edhe Plani i Rritjes për Ballkanin Perëndimor, mekanizmi financiar që synon integrimin gradual të rajonit në tregun e vetëm evropian dhe mbështetjen e reformave përmes një pakete financiare deri në 6 miliardë euro. Liderët e BE-së dhe Ballkanit Perëndimor pritet të tregojnë edhe vijimin e mbështetjes së tyre për Ukrainën.
