Presidenti amerikan Donald Trump tha të martën se një tjetër ekip amerikan u nis për të marrë pjesë në negociatat për Gazën, duke shprehur shpresë për një marrëveshje.
“Sigurisht që do të flasim për Gazën. Jemi në negociata shumë serioze”, tha Trump në Zyrën Ovale së bashku me Mark Carney, kryeministrin e Kanadasë që ndodhet në vizitë.
“Mendoj se ekziston mundësia që të kemi paqe në Lindjen e Mesme. Është diçka që tejkalon situatën në Gaza. Ne duam lirimin e menjëhershëm të pengjeve, etj. Dhe kështu ekipi ynë është atje tani, një ekip tjetër sapo është larguar”, tha Trump.
Trump tha se çdo vend në botë e ka mbështetur planin e tij prej 20 pikash për Gazën, i cili përfshin lirimin e të gjithë robërve izraelitë në Gaza në këmbim të të burgosurve palestinezë, një armëpushim, çarmatimin e Hamasit dhe rindërtimin e Gazës.
“Ekziston një shans i vërtetë që ne të mund të bëjmë diçka,” shtoi ai.
Trump përsëriti se një marrëveshje për Lindjen e Mesme është “shumë afër”.
“Ekziston një shans për të sjellë paqe në Lindjen e Mesme”, tha ai.
Kur u pyet se çfarë garancish po u jep partnerëve arabë se Izraeli nuk do të rifillojë ofensivën e tij pasi të lirohen robërit, Trump tha se negociatat janë ende duke vazhduar.
“Ne do të bëjmë gjithçka që është e mundur. Ne kemi shumë pushtet dhe do të bëjmë gjithçka që është e mundur për t’u siguruar që të gjithë t’i përmbahen marrëveshjes”, shtoi ai.
