Italia po bllokohet pothuajse e gjitha nga greva e përgjithshme në mbështetje të Gazës.
Qindra protestues janë mbledhur në Piazza Vittorio në Romë për grevën e përgjithshme të thirrur nga sindikatat pas ndalimit të Flotiljes Globale Sumud.
Trenat janë anuluar apo vonuar deri në 80 minuta në stacionin Termini të Romës në ditën e grevës së përgjithshme, të thirrur në solidaritet me Global Sumud Flotiljen.
Monitorët në stacion paralajmërojnë pasagjerët se deri në orën 20:59 trenat mund të vonohen ose të ndërrohen për shkak të një greve mbarëkombëtare nga stafi i Grupit të Hekurudhave Italiane, Italo dhe Trenord.
“Sot, një milion italianë do të mbeten të bllokuar vetëm në trena”, deklaroi ministri i Transportit Matteo Salvini, duke folur për ”Mattino5” në lidhje me grevën e përgjithshme të sotme.
”Kjo do të thotë një milion italianë të bllokuar në mënyrë të paligjshme”, këmbënguli ai duke iu referuar njerëzve që “humbin takimet mjekësore, ditët e punës, klientët dhe
mundësitë që kanë pritur prej muajsh”.
“Shpresoj që gjithçka të shkojë mirë”, shtoi ai duke theksuar se “fluturimet ITA janë të garantuara në 300 raste nga 325, trenat rajonalë janë të garantuar në 35% dhe trenat me shpejtësi të lartë janë të garantuar në 50%”.
Ndërkohë, mijëra protestues u mblodhën këtë mëngjes në Piazza Malpighi në Bolonja për të marrë pjesë në demonstratën e organizuar nga CGIL (Konfederata e Përgjithshme Italiane e Punës) me rastin e grevës së përgjithshme për Gazën.
Ndër të pranishmit në shesh ishin presidenti i rajonit Emilia-Romagna, Michele de Pascale, sekretari rajonal i Partisë Demokratike, Luigi Tosiani, dhe këshilltarja rajonale e Partisë Demokratike Simona Lembi.
Marshimet studentore po lëvizin nga shkollat e qytetit për të mbërritur në demonstratë.
Aktualisht po ndodhin ndërprerje, veçanërisht në transport, me anulimin e trenave rajonalë dhe vonesa të mëdha në trenat e distancave të gjata. Trafiku i autobusëve është gjithashtu jashtëzakonisht i kufizuar.
Vonesa dhe anulime për trenat që mbërrijnë dhe nisen nga stacioni qendror i Napolit.
Kjo është situata për transportin publik në Napoli në ditën e grevës së përgjithshme
të thirrur nga CGIL dhe USB në mbështetje të Flotiljes. Vetëm disa porta hyrëse në stacionin qendror janë të hapura. Këtë mëngjes, demonstratat sindikale të USB dhe CGIL pritet të mblidhen në Piazza Garibaldi dhe Piazza Matteotti.
Protesta ka filluar edhe në Peruxhia. Mbi 1 000 persona u mblodhën në Piazza Partigiani me pankarta dhe flamuj. Ato të sindikatave, CGIL dhe USB, palestinezë dhe me ngjyrat e ylberit të paqes.
“Ne bllokojmë gjithçka”, shkruhej në disa pankarta.
“Shumë njerëz dhe shumë më tepër do të mbërrijnë sepse ka një zgjim të një ndërgjegjeje civile që i thotë jo masakrës së popullit palestinez”, tha Maria Rita Paggio, sekretare e përgjithshme e CGIL Umbria.
“Ne jemi në sheshe në të gjithë Italinë me një slogan: ne bllokojmë gjithçka”, shpjegoi Gianluca Liviabella i USB Umbria.
“Presioni nga baza është i madh”, shtoi ai.
Studentët gjithashtu dolën në rrugë.
“Jemi në rrugë për shkak të të gjitha gjërave skandaloze që ndodhën në Gaza dhe në përgjigje të asaj që ndodhi këto ditë me Flotiljen. Studentët nuk duan atë që po ndodh”, tha Lorenzo Ferranti, koordinator i Rrjetit të Studentëve të Shkollave të Mesme të Umbrias.
Në krye të procesionit, të ruajtur nga forcat e rendit, ishte një flamur i madh palestinez.
