Kabineti i qeverisë libaneze që u mblodh sot mirëpriti planin e ushtrisë për të çarmatosur Hezbollahun dhe njoftoi se forcat e armatosura së shpejti do të fillojnë ta zbatojnë atë.
Qeveria nuk publikoi një orar dhe vendosi t’i mbante detajet e planit “sekret”. Zëdhënësi i qeverisë, Paul Morcos, tha se plani do të zbatohet, por paralajmëroi se ushtria ka aftësi të kufizuara, si në aspektin material, ashtu edhe në atë njerëzor, dhe se mund të kërkohet “kohë dhe përpjekje shtesë”.
Pas luftës me Izraelin, Shtetet e Bashkuara, Arabia Saudite dhe kundërshtarët kryesorë të grupit në Liban, të krishterët dhe sunitët, kanë ushtruar presion mbi Hezbollahun që të dorëzojë armët. Grupi shiit thotë se do të ishte një “gabim i rëndë” të diskutohej edhe çarmatimi, ndërsa Izraeli vazhdon sulmet ajrore në Liban dhe pushton territorin në kufirin e tij jugor. Katër persona u vranë në sulme të tilla të mërkurën.
Kabineti u mblodh për tre orë, gjatë të cilave plani i çarmatimit u prezantua nga komandanti i ushtrisë Rodolf Haykal. Të pesë ministrat shiitë dolën nga dhoma në shenjë proteste kur hyri Haykal.
Morkos tha se qeveria “e mirëpret” planin, por nuk sqaroi nëse kabineti e kishte miratuar zyrtarisht atë.
Ministri i Punës, Mohammad Haidar, i cili është i afërt me Hezbollahun, u tha mediave lokale para takimit se çdo vendim i marrë në mungesë të ministrave shiitë do të ishte i pavlefshëm dhe do të konsiderohej shkelje e sistemit të ndarjes së pushtetit në Liban.
