Presidenti i SHBA-së, Donald Trump, ka thënë se udhëheqësit e Rusisë dhe Ukrainës duhet të takohen kokë më kokë përpara një samiti të mundshëm trepalësh për paqe.
Trump u takua me Presidentin rus Vladimir Putin në Alaska të premten dhe priti në Uashington presidentin e Ukrainës Vladimir Zelensky tre ditë më vonë. Ai këmbënguli që palët të fillojnë të punojnë drejt një paqeje të qëndrueshme pa arritur më parë një armëpushim, siç kanë sugjeruar disa udhëheqës evropianë.
“Pata një takim shumë të suksesshëm me Presidentin Putin. Pata një takim shumë të suksesshëm me Presidentin Zelensky. Dhe tani mendova se do të ishte më mirë nëse do të takoheshin pa mua, vetëm për të parë, dua të shoh se çfarë do të ndodhë”, tha Trump në emisionin radiofonik të Mark Levin të martën.
“E dini, ata kishin një marrëdhënie të vështirë, shumë të keqe, shumë të keqe. Dhe tani do të shohim se si do të veprojë dhe nëse është e nevojshme, dhe ndoshta do të jetë, por nëse është e nevojshme, unë do të shkoj dhe ndoshta do të jem në gjendje ta mbyll [marrëveshjen]”, shtoi ai.
Zelensky u tha gazetarëve të hënën se është gati për një takim të mundshëm me Putinin.
Ndërsa Kremlini nuk ka komentuar mbi propozimin e fundit, Putin tha më parë këtë vit se është gati të takohet me Zelenskyn gjatë “fazës përfundimtare” të negociatave. Ndihmësi kryesor i Putinit, Yury Ushakov, shtoi të martën se Moska mbështet vazhdimin e “negociatave të drejtpërdrejta midis delegacioneve nga Rusia dhe Ukraina”.
